Nyuma y’imyaka 10 bakundana, Usengimana Faustin na Bayingana Daniella bagiye kurushinga

Usengimana w’imyaka 25 yatangiye gukundana na Daniella mu 2009, bivuze ko aba bombi bamaranye imyaka 10 bari mu rukundo ibidakunze kugaragara mu byamamare yaba hano mu Rwanda n’imahanga.

Abakurikirana imbuga nkoranyambaga za Usengimana n’umukunzi we, ntibahwema kubona iby’urukundo rwabo cyane ko usanga buri umwe adahisha kwerekana ko yanyuzwe n’ubuzima babanyemo.

Babigaragazaga bifashishije amafoto berekanaga aherekejwe n’amagabo aryohereye cyane aranga abari mu rukundo. Aba bombi kandi bahuriye ku mpakanizi igira iti #TEAM15FORLife, ijambo bakunda gukoresha bombi ku mbuga nkoranyamabaga zabo.

Magingo aya, biyemeje kubana akaramata nk’umugabo n’umugore mu birori biteganyijwe mu Ugushyingo uyu mwaka.

Impapuro z’integuza y’ubukwe bwabo zigaragaza ko tariki 9 Ugushyingo 2019 aribwo hazaba imihango yo gusaba no gukwa, ikabera mu busitani bwa Kaminuza ya UTB ishami rya Rubavu ari naho Bayingana Daniella avuka.

Tariki ya 11 Ugushyingo 2019, Usengimana n’umukunzi we bazasezerana imbere y’Imana kuri Parkland Remera ruguru y’ahazwi nko ku Mushumba mwiza.

Usengimana Faustin yakiniye amakipe atandukanye mu Rwanda arimo Rayon Sports yanazamukiyemo na APR FC, aha hose akaba yaragiye atwara ibikombe. Ari mu itsinda ry’abakinnyi Rayon Sports yifashishije ikora amateka yo kugera mu matsinda mu irushanwa rya CAF Confederations Cup mu 2018.

Usengimana Faustin kandi yanakiniye ikipe y’igihugu mu byiciro byose yaba icy’abatarengeje imyaka 17, 20, 23 n’ikipe y’igihugu nkuru.

Nyuma y’uko atandukanye na Khaitan Sporting Club yo muri Kuwait, ubu arabarizwa muri Zambia muri Buildcon FC, akaba ari no mu mu bakinnyi b’inkingi za mwamba muri iyi kipe.

 

    Love this post? share among your friends
    •   
    •   
    •   
    •   
    •  

    Leave a Comment