Ubuzima bwa Magufuli bwaba buri mu kaga!

Mu gihugu cya Tanzania kuri iki cyumweru haramukiye icyoba nyuma y’amakuru yavugaga ko ubuzima bwa Perezida Magufuli bwaba butameze neza.

Ibi rero byatangiye gukwirakwizwa ku mbuga nkoranyambaga, Abanyatanzaniya bashaka kumenya uko ubuzima bw’umukuru w’igihugu cyabo bwifashe.

Guverinoma ya Tanzania, ntacyo iratangaza kuri aya makuru.

Ariko amakuru aturukamo imbere aravuga ko ahagana saa sita hasohorwa itangazo rigenewe itangazamakuru ritanga ibisobanuro ku buzima bwa perezida.

Amakuru yagiye akwirakwizwa aravuga ko kuri uyu wa Gatandatu Perezida Magufuli yajyanwe igitaraganya mu Budage ngo abashe kwitabwaho n’abaganga kabuhariwe nyuma yo kugira ikibazo cy’umutima.

Iyi nkuru dukesha Chimpreports ikaba ikomeza ivuga ko amakuru avuga ko Perezida Magufuli yafatiwe mu Mujyi wa Lindi uherereye ku nkengero z’Inyanja y’u Buhinde, mu majyepfo ya Tanzania, mu birometero 450 uvuye i Dar es Salaam.

Ubusanzwe ubuzima bw’abakuru b’ibihugu muri Afurika  bukunze kugirwa ibanga rikomeye mu rwego rwo kwirinda ibihuha no guteza ubwoba bitari ngombwa.

Perezida Magufuli yari mu Mujyi wa Lindi, aho yasaga nk’uwatangiye ibikorwa byo gushaka amajwi mbere y’amatora rusange ateganyijwe muri Tanzania mu mwaka utaha.

Bivugwa ko indege ya kajugujugu  ya gisirikare yahamagajwe ngo ivane perezida aha imusubize mu murwa mukuru, aho yavanwe ajyanwa mu Burayi.

    Love this post? share among your friends
    •   
    •   
    •   
    •   
    •  

    Leave a Comment